Allt það sem
er að gerast um
verslunarmannahelgina
4 ágúst - 7 ágúst 2017.

Um hátíðina

Alls kyns jaðaríþróttir, þrekraunir, útivist og leikir, verða í brennidepli um verslunarmannahelgina á Akureyri. Íbúum og gestum bæjarins gefst kostur á að spreyta sig í fjallgöngum, þríþraut, sjósundi, hjólreiðum, hlaupum, siglingum og fleiru. Fólk getur hvort heldur sem er keppt við sjálft sig eða aðra - en eins og vera ber um verslunarmannahelgi er markmiðið fyrst og fremst að fjölskyldan öll, eða einstakt hæfileikafólk innan raða hennar, fái notið sín með heilnæmri hreyfingu og útivist.



Um helgina verður boðið upp á þéttskipaða dagskrá af stærri og smærri viðburðum en af stærstu viðburðunum má til dæmis nefna heimsmótaröð unglinga í golfi, Súluhlaup, fjallahjólakeppni, strandblakmót, crossfit keppni, lengri og styttri hlaup og margt, margt fleira. Allir geta tekið þátt í leik eða keppni við sitt hæfi en einnig verður áhugavert að fylgjast með skrautlegum keppendum og litríkum uppákomum í þeirri einmuna veðurblíðu sem gert er ráð fyrir að verði á Akureyri í allt sumar.


Allir sem ætla á Sumarleikana á Akureyri um verslunarmannahelgina ættu að grípa með sér hlaupaskóna, gönguskóna, reiðhjólið, kayakinn, golfsettið, frisbee diskana eða hvaðeina sem tengist tómstundum, útivist og skemmtun. Unað verður við leik og keppni alla fjóra dagana, sumir reyna mikið á sig en aðrir ekki neitt, og á kvöldin verður boðið upp á dansleiki og glæsilega tónleika með mörgum af þekktari hljómsveitum landsins á skemmtistöðum bæjarins.

Vefsíða